陳法拉望舊愛薛世恒覓得好女仔

藝人陳法拉出席品牌秋冬系列派對，久未露面的她，透露近日在美國上進修演技課程，加上近日主力在內地工作，包括拍攝電影及廣告，故減少了在香港出席公開活動：「電影方面最近有新計劃，但暫時未可以講得住，出年會返多啲嚟香港，係一個特別角色。（有冇留意胡杏兒離巢及傳徐子珊離巢？）冇留意，唔太了解！（依家無綫有冇搵你拍劇？）間中會有劇本，但時間同劇本唔夾，短時期都唔考慮拍香港電視劇！」

問到舊愛薛世恒近日分別與歌手梁雨恩及趙頌茹傳緋聞，法拉表示：「要向前望！（同佢有冇聯絡？）朋友間唔中都會聯絡同問候，希望佢開心！（有冇問佢係咪拍拖？）我唔喺香港，好多嘢做，冇見面！都會關心佢，希望佢搵到個好女仔，因為佢係一個好男仔！（咁你依家有冇追求者先？）都係單身！（好多追求者？）唔多！最緊要係睇緣份！」