乜都老婆話事!王浩信拖實YoYo出巡

20150804
東網電視
更多新聞短片
王浩信趁工作空檔帶老婆陳自瑤行街街睇戲兼撐檯腳,仲要全程聽晒老婆話,睇嚟佢唔單止係樓奴,仲係老婆奴喎。
與老婆陳自瑤(YoYo)結婚三年的王浩信(Vincent),今年初被指背妻女撻着劇集《東坡家事》拍檔黃心穎,令三年婚姻凍過水!雖然有傳YoYo於緋聞爆出後嬲到分房瞓,但對外她則力撐老公,更指緋聞是笑料一則!
事隔半年,緋聞終於告一段落,而忙於為新劇《樓奴》宣傳的Vincent,更變身「老婆奴」利用宣傳空檔拖老婆行街睇戲!
日前下午約五時,王浩信拖住戴口罩的YoYo現身西九某商場,二人更戴上情侶眼鏡,以「黑白雙煞」造型出巡,盡顯默契!兩人先在日本餐廳駐足睇餐牌,再行至戲院售票處左望右望,YoYo指手劃腳一輪後,二人便排隊買戲飛,過程中Vincent不發一言,任由老婆話事!
買好飛後,二人折返日本餐廳用膳,一個鐘後才見他們離開。十指緊扣的兩人,其後步入名店睇袋,只見Vincent不時彎腰並向老婆詢問意見。二人逗留約五分鐘後,便離開並前往洗手間方向,在門外等候的Vincent全程寸步不離,簡直是「愛妻號」上身!
期間記者上前表露身分,兩人依然十指緊扣兼大方影合照,Vincent更趁機宣傳其擔正的《樓奴》。當問到二人睇哪一齣戲時,Vincent語帶猶豫地說:「好似係卡通片啩!」身旁的YoYo即補充謂:「我哋去睇《玩轉腦朋友》。」明顯由老婆話晒事!戴口罩的YoYo則坦承生病:「係有少少唔舒服。」說畢便雙雙向戲院方向離開。雖然二人沿途被認出,但Vincent亦未有鬆開手,誓要拖實感到不適的YoYo,認真體貼!
其實Vincent修心養性做「住家男」早已有迹可尋,日前他出席《樓奴》宣傳活動時,不時將老婆及囡囡掛在嘴邊,更自爆想為囡囡儲錢上車做樓奴,明顯想洗底做廿四孝老公及爸爸!