網民熱話：新版《愛．回家》冇「家」味？

無綫處境劇《愛．回家》嘅舊版唔經唔覺就已經播咗三年喇，舊版主力係sell家庭溫情，令到唔少網友都有共鳴感，喺劇入面搵到屋企嗰種感覺，而主幹成員入面嘅馬柔、馬壯同馬子妮等等，每晚都成班一齊食飯，唔睇劇情都已經夠晒熱鬧！

不過喺今年6月嗰陣，《愛．回家》就推出咗新版，以健身室及海味鋪延續《愛．回家》精神，同時加入新成員張繼聰、黃翠如、張振朗、吳業坤等等，而骨幹成員郭少芸同劉丹就漸漸淡出，但終會有一日佢哋會「回歸」，不過就唔係短期內嘅事，當時身為孻姑嘅郭少芸仲喊晒口咁話唔捨得，唔單止觀眾唔捨得，其實連劇中演員都唔捨得！

喺今年6月播出嘅新版《愛．回家》曾經錄得平均25點收視，成績令人滿意。但有唔少網友就話，因為故事多數都係講健身室同海味鋪，骨幹成員就分別落喺兩part人身上，就係張繼聰同黃翠如，以及張振朗同麥長青嗰家人身上，再加上網友話佢哋兩家人都冇乜聯系，所以「家」嘅味道唔係好夠。而唔少網友都發現依家新版講愛情好似多過講親情，所以都話有少少失望，話好掛住舊版，仲好想馬家快啲回歸添！另外，有網友提議反正依家都換晒人同故事，加上新版都係用瑜伽為主題，可以考慮吓叫《愛．瑜伽》，感覺仲親切啲添！

網民熱話：

天XX子：我只係想睇馬家開開心心

XX狗 ：畀返（番）馬家心靈感應我

XX民傑：拉（孻）姑~~~

今XXX歲：舊愛回家，起碼有平衡到親情同情情搭搭，最尾果集有講神男人為左大sir唔做律師又有搭電車懷念前女友，我都睇到眼濕濕。新愛回家係9:1，好似得翠如同繼聰一條線咁

XX樂：換埋季，換埋主角，換埋名喇:愛瑜伽