態度180度轉變！鄧紫棋強調從不抗拒受訪

「宇宙巨漿」鄧紫棋（G.E.M.）孖緋聞男友馮允謙到會展睇騷，之後更罕有地接受訪問。G.E.M.笑謂自己現時很準時，問到可是因為上年在新城頒獎禮上扮大牌遲大到一事而改過？她謂：「我知道details嘅話，就會盡量準時到。（改咗壞習慣？）唔係呀，之前溝通有問題，自己一向有得準就準時。」

講到早前新城音樂會上，大會突然通知G.E.M.不接受傳媒訪問，對此她解釋：「嗰個演唱會唔係我決定架！我前一日都有問會唔會做訪問，佢哋話唔做，我都唔知點解。同埋嗰陣我已經同公司講要重整啲人員，依家重整咗，請咗個新女仔，我自己覺得所有嘢都詳細好多。（之前係工作人員講得唔夠詳細？）有一啲比較有問題嘅工作人員，依家唔喺我哋公司啦。（工作人員有咩問題？）例如有啲唔聽電話，冇交帶。（但當日記者係去到現場先話你唔做訪問？）咁大鑊！我前一日都問咗佢哋，話唔做訪問，我問點解，但佢哋冇解釋，其實自己已經ready好做訪問，我覺得面對面接觸到。其實你嘅態度或真唔真誠大家係感覺到。」

問到她今次接受訪問，可是想跟傳媒修補關係？她則謂最緊要彼此尊重：「其實一路好想身邊同我做嘢嘅人係開心嘅，所以之前任何誤會，一開始我覺得點解有咁多呢啲嘢，但後來覺得如果我哋嗰邊可以避免呢啲發生就最好。」

她又笑言現在新來的女工作人員是自己介紹給公司：「佢係我之前做嘢見過，覺得佢做嘢好有交帶，佢係好開心嘅人。（靠晒嗰個女仔修補傳媒關係？）我覺得有多啲唔同機會面對面見到傳媒係最好嘅。（以後唔會唔做訪問？）應該係唔會嘅，上次新城嗰次，我根本就唔知，我可控制嘅情況下係唔會。」

不停流汗

問到她可會更多時間留在香港？她謂：「其實幾多喺香港架，過兩日都會去新城國語力頒獎禮，我今次已經同嗰邊講咗會做訪問，兩個月前冇做訪問我已經講國語力要做。」而訪問期間，G.E.M.熱到不停流汗，未知可是因太久未有接受香港傳媒訪問而感到緊張。