黃浩然唔信佘詩曼嫌棄自己

藝人黃浩然出席有關武術的慈善新書發布會，他表示每樣武術均都認識少許，跟冼灝英師傅學武：「刀、槍、劍、棍、泰拳都識啲，最有用嗰陣係拍《拳王》，因為佢都識泰拳，同埋我覺得國術係中國傳統文化，尊師重道係幾值得人學習，係一種美德，值得傳承，同埋運動對身體好，自己都有keep住學，跟冼師傅學咗8、9年啦。」

早前患病的他曾停工休息約一年：「舊年8月至今年7月先開番劇，初頭都有啲擔心，不過又好快進入狀態，飲食會注意啲，會自己帶一兩餐太太整嘅飯，蔬菜為主，注重營養，好彩自己身體ok同ready，鬆咗一口氣。（仲踩盡？）劇組會，外景再開廠，幾高體力要求，到目前為止ok，應付到。」

問到有傳他早前被選定為《呂后傳》一角，有份演出的佘詩曼嫌棄自己？他說：「我唔知發生咩事，我只知舊年4月本身開戲，但安排上有問題就未開，最近同添哥見面，添哥話未有人選，仲未知點，公司嘅劇有好多變動，之前拍節目巡禮嗰陣係安排我去拍，我亦預咗檔期去拍，未聽過第二啲人選，只知係自己，亦知係阿佘，但一日未開工都有好多變動。（你信唔信佢咁講？）我哋私底下ok，合作好愉快，我梗係唔信。（成日被人嫌棄會唔會唔開心？）咁我唔會，有啲嘢寫出嚟係想你唔開心，都咁多年，自己由低做起，咩都做過，再加上之前有病，自己私底下又唔係同阿佘結怨，唔會有hard feeling。」

談到有傳添哥身體不好，他表示最近有跟對方見面：「佢係腳同腰骨痛，到目前為止我個日同佢食飯都ok，佢精神架。（係咪有心血管問題？）佢冇同我講過，我唔知。（咁有冇話幾時開戲？）佢話劇本搞好架啦，其他等公司安排，佢係一個處之泰然嘅人，做好本份有個劇本，幾時開就要等公司搵人。」