自認內外Open！伍詠薇嘲楊怡神經質又怕醜

藝人伍詠薇（伍姑娘）到將軍澳電視城為無綫節目《今晚睇李》擔任嘉賓，與同場的陳敏之鬥騷性感。「中門大開」的她自稱為「伍薇娘」，笑稱其性感性度之高要為自己打格仔。她在拍照和訪問期間，更偕敏之及單立文玩到癲，猛打二人屁股兼大放笑彈！單立文見兩女的性感衣着，都忍不住揶揄一句：「你兩個着到咁樣上我個節目，成何體統？」場面搞笑！

嘲敏之係「悶棍」

期間，伍姑娘提到敏之大讚她的閨房密事多籮籮，她則反諷敏之為人沉悶，說：「我估計陳敏之同佢個身型一樣，係『悶棍』一條！佢哋由拍拖到結婚，我就贈佢哋四個字『細水長流』。敏之呢個型係比較保守，呢個妻子內外都係保守，不過都係一個賢內助嚟。（咁你自己呢？）我就係外表open，內裏都有少少open啦！雖然我有經驗，但我唔會指導人，如果太多人學識，呢個社會就會變得壞！」

自認夠大膽

伍姑娘又直認與丈夫結婚十六年，都氹得丈夫很開心，更引用自己媽咪的名言，笑說：「我阿媽教落，呢個世界無嘢相向，都係你氹吓我、我氹吓你，咁就一世。」雖然伍姑娘表示自己的姊妹當中各有性格和對付男性的手段，不過她亦直認自己最明目張膽，更大爆楊怡「得意」，說：「佢一聽到呢啲嘢就好神經質，一講kiss佢就會話『咦！唔講呢啲』所以我好鍾意同佢玩。我只可以認我唔怕醜，同啲男仔傾有味笑話都ok！」