新進樂隊Nowhere Boys主打電影式搖滾

20150807
東網電視
更多新聞短片
新進樂隊Nowhere Boys。

新進樂隊Nowhere Boys於今年初正式成軍,成員包括主音Van、鍵琴手魚佬、結他手Ken、鼓手Nate及低音結他手Hansun,雖然樂隊歷資尚淺,但五位成員嘅音樂功力深厚,有成員大學時期主修音樂表演,亦有成員自小學習各類樂器,五人來自唔同嘅背景,但最終一拍即合,講到樂隊組成契機,Van話:「一次喺電影音樂騷上我識咗Nate,咁啱就jam咗首歌,佢就搵我組隊band,於是我喺我識嘅人裏面搵到呢班人。」

要喺云云樂隊中突圍而出,Nowhere Boys有明確定位:「我哋玩『電影式搖滾』,因為成員本身玩音樂嘅風格唔同,同一時間玩live都有好多唔同聲效,希望做到每一首歌都有唔同嘅故事,聽完一首歌就好似睇咗一套電影,而我哋嘅音樂都比較大眾化,希望任何人聽到都會喜歡我哋。」問到家人對全職做音樂嘅睇法,建築師出身嘅Van笑言其他成員一早同家人「傾掂數」,身為唯一「半途出家」嘅成員,佢大方分享:「因為我已經完成咗佢哋想我做嘅嘢,都做咗好多年正職建築師,所以好想做一啲自己想做嘅嘢,咁啱有一班樂手好夾得埋,於是我同家人講辭咗呢份工。」

由於沒有簽約大公司,Nowhere Boys成員都有兼職副業以支持樂壇經營,但都離唔開音樂,以教授樂器為主,而Ken更會兼職「結他醫生」,不過問到有冇擔心全職夾band會搵唔到食?佢哋就話:「如果真係擔心搵食,咁一定唔會夾band!呢樣係我哋鍾意做嘅事,就唔會諗咁多!」