曹敏寶開簽唱會　家姐曹敏莉帶囡囡嚟撐場

歌手曹敏寶（Abo）舉行新發燒碟簽唱會，身穿瑩光粉紅高衩長裙的她即席獻唱，家姐曹敏莉帶同四歲囡囡Dora現身支持，她們更上台獻花。

受訪時，Abo講到第二年出發燒碟，亦是第二次舉行簽唱會，她表示：「其實依家hi-fi碟都年輕化，監製都想我唱吓新歌，造型都會新鮮啲，感覺活力啲，新碟有翻唱人哋嘅歌，都有自己嘅歌。」她亦講到自己入行十年，之前都試過搞迷你音樂會：「但因為發燒碟係鍾意靜靜哋聽，比較神秘，所以咁樣壓力就細啲，但現場要求當然高啲，所以大啲壓力。（自己想唔想再開音樂會？）我依家都差唔多儲夠歌，成日就會畀啲壓力公司，有時啲fans都會問我幾時出黑膠碟。（自己想出黑膠碟？）想呀，因為經典，樂迷都有擁有一隻，而且作為hi-fi歌手，呢個（出黑膠碟）係成就。」

而曹敏莉囡囡就謂想買十隻碟支持Abo，曹敏莉就笑言會買多過十隻：「我自己收藏啲，又畀啲朋友，佢出第一隻我買左廿幾三十隻，上面有佢嘅簽名，但唔夠派畀朋友，所以今次會買多啲，但可能買住廿隻先，驚買得多其他人買唔到。」她亦透露囡囡愛唱歌，亦愛扮Abo唱歌。