娛樂專題：徐子珊為找尋真我放棄愛情

「每個女仔都視結婚及生仔為人生目標。」這番話套在兩年前的徐子珊身上很正確，但所謂女人善變，現年36歲的她已有另一番體會，認為自己正處於人生迷失階段，虛幻的愛情反而令她更困惑，故寧願放棄！沒有感情寄託的子珊嘗試轉戰幕後執導演筒，同時修讀珠寶設計，誓要作全方位發展！

藝人在水銀燈下的生活多姿多采，其實卸下華麗裝束之後，根本與普通人無異，也會經歷戀愛、結婚和生小朋友等階段，分別就只在高調還是低調處理，有人選擇嫁入豪門便引退，有人繼續默默耕耘，不過原來還有第三個選擇：棄愛！貴為無綫花旦的徐子珊，有事業、有樣貌、懂得多國語言，裙下之臣多的是，但她偏偏認為拍拖並不是生命中的首要事情，認真你急佢唔急！

生命除了拍拖，還有……

猶記得兩年前的子珊，曾在訪問中透露欲如普通女性般組織家庭，還憧憬婚後全心照顧家庭、生小朋友……時至今日，再問子珊，看法原來已有180度轉變，果然善變是女人的專利！

雖已達適婚年齡，仍然單身的子珊卻看得淡然，問到會否想拍拖？她竟說：「我覺得呢樣嘢喺呢個時間唔重要，同埋會有少少質疑愛情對生命係咪咁重要，將來就唔知，總之唔係特別令我心靈上會有滿足感，亦唔會帶到心境平和。」她自言處於迷失期，不適合陷入愛情增加自身負擔：「愛情係一樣好虛幻嘅嘢，依家呢個階段只會令我更加Confuse。（覺得自己迷失啲乜？）我都唔知自己係邊個，過去咁多年一直都好忙，根本唔了解自己係點嘅一個人，呢兩年靜少少就會停低諗，會了解自己多咗！」

原來，做導演好有趣……

曾獲《香港電影金像獎》「最佳新演員」的子珊，在11年的演員生涯中主力拍電視劇，即使曾奪影壇殊榮，也沒有多花時間於電影之上，對本有機會大展拳腳的她來說有點可惜，幸好子珊一直未有放棄電影夢，只是崗位方面有所改變：「嚟緊我會開始試幕後工作，有行內人建議除咗演員之外，亦試吓其他崗位，開頭聽都唔信，會驚囉！但當幾個唔同人都講同一番話，有機會我都想試吓。有時同佢哋傾外國電影，佢哋會驚訝原來我都有研究，好似法國電影題材同亞洲好唔同，我平時睇好多法國戲。（想做邊方面嘅幕後？）冇咩所謂，有前輩叫我試吓做導演，最好自己有古仔。（有冇構思？）都有諗吓古仔，咁會全面啲，其實都有人同我傾緊，慢慢構思啦！又唔急嘅！」

我想，為自己下決定！

近年不少無綫花旦離巢，接近約滿的子珊透露公司一直與她緊密聯繫，亦有不同方案給她選擇，惟她尚未知道將來的路應如何安排，故內心極為苦惱，不斷掙扎下仍未有答案：「我未了解到自己想要乜，呢11年以嚟好似冇為自己去做一啲決定，所以唔知自己要乜，唔想心未定就去做重大決定。（有冇構思未來方向？）想，但暫時未做到，只知會繼續喺演藝行業，同時想做珠寶設計，都想做社會公益，點落實暫時諗唔到。有珠寶公司覺得可以同我合作吓，嚟緊想推出一個系列，會賣（口架），但我未諗到個名。（幾時推出？）冇咁快，傾緊合作方法啫！依家集中時間上課學吓嘢先。」

得5句對白　演活自閉貓女

子珊近日拍攝吳家麗執導的鬼片《有客到》，飾演一名擁有陰陽眼的自閉女子，在紙紮舖工作的她閒時只與貓溝通，全片僅有5句對白，其餘戲份既要模仿貓的神態，又要唱歌跳舞和學紙紮，事前要做足大量資料搜集，子珊說：「最困難係扮貓，我上網睇好多Video，記得有段係倣效舞台劇《Cats》嘅舞要我跳，跳成10分鐘，好慢嘅，但有啲好似Contemporary（現代）舞咁，雖然有底子，但疏於練習，所以拍之前要去拉筋，都有啲壓力！（仲辛苦過拍劇？）都係，有啲角色唔使咁大量功課，拍時情緒低沉，都有崩潰戲。」拍攝期間亦曾到殯儀館取景，為配合特效，子珊需要演出驚慌表情，適逢拍攝當晚突然刮起大風，令附近的花及樹葉被吹起，非常應景，故毋須扮驚已非常入戲，她笑說：「現場環境真係好幫到我入戲！（拍完有冇去熱鬧地方兜個圈？）收工都天光，好眼瞓，仲去多人地方？梗係返屋企瞓啦！」

一年5套劇　拍太多會麻木

記得子珊最瘋狂的時期，一年拍5套劇，可謂忙到有氣冇碇抖！所以去年起她與公司取得共識決定減產：「公司畀好大自由度我，睇吓點平衡到，令我有空間感，攰係一定會，始終身體負荷唔到經常唔瞓，要時間慢慢復原，我想貴精不貴多，拍得多自己會麻木，唔鍾意見到自己用同一方法做同一角色，所以之前去美國上堂原因都係咁，我了解自己本身冇Technique（技巧），每次都憑感覺去演，所以都希望觀眾睇到唔同嘢，嚟緊有時間都想再去上堂。」