石詠莉黑膠碟遭黃牛黨炒貴四倍嗌無奈

一連三日的「2015香港高級視聽展」昨日圓滿落幕，在今個視聽展上贏盡風頭兼升呢Hi-Fi小天后的石詠莉（Sukie），直言在樂壇重新出發令她謂獲益良多：「最開心係每一次當我企喺攤位時，都感受到聽迷對張碟嘅熱愛，佢哋每講一句說話我都感受到溫暖，呢樣係我從未試過。」除此之外，她亦自爆唱到腳痛，因為連續三日腳踏6吋高踭鞋行嚟行去，她笑說：「我返到屋企先知腳掌原來好痛好痛，真係救命。雖然呢幾個月嚟我同Patrick（鄧健泓）為張碟都搞得好辛苦，乜都一腳踢，但得到大家好窩心一句話叫我加油，我已經心滿意足。」

此外，Sukie特別從日本訂製的300張黑膠碟已在視聽展上售罄，火速斷市，本來令她非常興奮，豈料當她得悉心愛限量黑膠碟被炒時卻感到震驚，當中有黃牛黨以有Sukie親筆簽名兼靚冧把的黑膠放於網上兜售，竟然由原價三百多蚊一張高炒至一千五百蚊，炒貴接近四倍，Sukie對此大感無奈：「我當然唔助長炒風，最慘係黃牛黨賺嘅錢多過我哋，但我哋仲未回本，所以，唉……成件事幾surprise！我都唔想咁，自己第一次畀人炒，真係好無奈！」

Sukie又謂今次難得和一班喜愛音樂朋友互相交流，她現正與製作人考慮推出黑膠以外的其他格式製成品，又決定不放假繼續鑽研音樂，同時她更希望將來可以舉行個人音樂會，圓夢之餘亦可回饋歌迷。