蔡思貝心郁郁想拍危險戲　吳啟華一味靠嚇

藝人吳啟華與蔡思貝於無綫電視城拍新劇《純熟意外》，劇情講述兩人趕至天台拯救墮樓的陳山聰。提到劇中不乏多場危險動作戲，啟華透露有撞車拋出車外兼被輾手的戲，思貝則謂稍後拍攝被困水底自救的場面，她更笑稱現實中不會試到，故很期待拍攝這個場口，又認為好好玩、好刺激！

啟華見過有人斷威也嗌驚

在旁的啟華聞言即笑道：「好玩？好辛苦㗎！佢今日又話想吊出去外面，真係冇乜畀人吊過，好危險㗎，就算吊都唔會吊我哋出去，會搵替身，威也會斷㗎，我見過人斷威也撻落地，做演員冇必要就唔需要冒險，監製都唔會畀我哋冒險。」

思貝撒嬌無效

對於思貝將拍落水戲，啟華又笑說：「如果拍水底戲真係要小心，欺山莫欺水呀。」之後又指着普通衫落水更慘，皆因衣服吸水後變重，遭對方連番「恐嚇」的思貝即笑謂：「原本我好興奮，但你不斷咁講，好驚。」啟華再次「發功」續說：「喺海拍仲得人驚，會有暗湧，試過去遊船河，想游番上船，但游唔到，愈游愈遠，幾得人驚！」思貝隨即向他撒嬌：「你要救我喎！」啟華卻抵死地回應：「我丟個水泡畀你！」

陳山聰扮聲沙一個月

至於獲替身代拍墮樓戲的山聰，自稱身手好只是有點畏高。劇中，飾演DJ的他遭下毒導致聲沙，更持續扮沙啞拍戲達一個多月。談到早前與好友組成「Crazy Runner」跑步隊，他希望將其發揚光大，感染到身邊的家人、朋友，又盼一起多做慈善活動，稍後也會參加跑步比賽，目前也未諗會否以組合接廣告。