不甘被李逸朗消費　蔣雅文要爆喇！

女神蔣雅文（Mandy）同李逸朗（Don）早年以組合形式發展，仲傳出緋聞，後來就各散東西，一個去台灣追夢，一個去大陸搵機會。直到今年一月一號，Mandy宣布已婚，冇耐Don就推出哭腔版《傻女》Hit爆全城，當時更盛傳Don係因為Mandy結婚，所以情緒大受影響，先可以唱得咁聲嘶力竭、感人肺腑，但後來兩人都雙雙否認，表示只視對方為拍檔，且從來冇拍過拖！

日前Mandy由台灣返咗香港搞pop up store，Don就特登去咗探舊拍檔，仲將同Mandy嘅selfie post咗喺instagram，留言話「七年之約」，之後仲為網上電視台拍咗段片惡搞番自己，自嘲做咗好多年兵乜乜乜。不過有網民就唔係幾受落，喺Don嘅facebook留言鬧爆佢抽Mandy水博宣傳，引起Don同網民嘅罵戰，仲自爆「七年之約」係指，當年離開舊公司時，佢哋曾經約定過要為生活好好打拼。

好喇！喺依一刻，好少提起Don嘅Mandy都忍唔住要爆喇！Mandy喺今日凌晨時分於facebook發文，大爆當年同Don對工作嘅期許同處事方式唔夾，仲因為情緒問題而影響正常生活，所以先會拆夥各自發展；之後Mandy就開始講從今年年頭到依家，同Don嘅新聞不斷，令佢開始有啲頂唔住，「對生活已經造成了一定程度的困擾　加上期間從沒徵求過我的同意　雖然一直置身事外不作反應　但長時間忍耐的底線亦逐漸疲弱」，更寫道「真心佩服你（應該係講緊Don）對工作的熱情和耐力　但也請尊重我的生活」。

最後，Mandy就表示唔會就依個話題再受訪，雖然Mandy不滿被消費，但喺文尾Mandy都勸各位網民留言時唔好人身攻擊，仲會錫住Don，Mandy都算係咁！