KillerSoap機上獻聲　助造型師抱得美人歸

樂隊KillerSoap主音陳樂基（Rocky）在《中國好聲音》第三季成功憑《月半小夜曲》而一夜爆紅，更獲封為「巨肺李克勤」。最近樂隊獲香港航空邀請，為配合「Sweeten You Up」主題，破天荒舉行亞洲首個空中快閃音樂會，在香港飛往杭州的航班上「Sing」上雲霄！

KillerSoap五子在飛行到三萬三千呎時，突然現身在經濟機艙，近百名乘客爭相舉機拍照，樂隊率先唱出新歌《長大就是這樣》，Rocky使出招牌巨肺式高音，連空姐也拍手跟住唱，名副其實是至「High」音樂會。之後，他們再唱出浪漫情歌《Distance》，期間樂隊造型師嚴先生拿住鮮花向正在值班的空姐女友求婚，並邊下跪邊眼濕濕宣讀愛的宣言，空姐女友即時喊住應承。

其後KillerSoap接受《東網》訪問時，表示事前緊張到失眠，Rocky說：「我一路以為喺邊度唱歌都一樣，但今次係全亞洲第一次喺飛機做快閃音樂會，要做『第一』寧舍緊張，我前一晚已經特登早啲上床瞓，但一上到床就係咁Load個流程，自己平時演唱會唱廿幾首歌，都冇今次玩兩首歌咁緊張。」

成員文文亦坦言雖然早已上機綵排，但臨場表現有點騰雞，希望有機會再舉行第二次的高空快閃。問到在高空唱歌可會出現耳鳴影響表現？他們表示：「正如船員搭得多船都唔會暈浪，我哋飛得太多啦，冇耳鳴呢個問題，不過啱啱開始前，聽到前面有小朋友喊，同平時情況一樣呀。」

五子透露事前已得知造型師好友會上演浪漫求婚，笑言本以為準新娘會哭成淚人，怎料是準新郎率先落淚：「我哋都好驚破壞氣氛，話晒一世人一次，唔想搞到唔夠完美。」有隊友踢爆Rocky也被感動得眼濕濕，上月也剛向女友求婚的他笑稱：「我眼瞓咋，我自己求婚都冇喊，可能心理準備好晒。開頭我有諗過自己都喺飛機上求婚，但造型師個未婚妻係空姐，做呢件事好似有紀念性啲。」

問到睇好隊中誰是下一個「人夫」？各隊友不約而同指向成員細佬，更笑指他最大機會搞出「人命」：「下一個結婚嘅好可能係『意外』，細佬後生，好容易『犯錯』，少壯須努力啦！」