網民熱話：四個小生重新選角

謝賢尋日向曾江爆粗發火片段喺網上被瘋傳，成個Facebook都洗晒版！將近八旬嘅謝賢公然喺記者會場內「開片」，仲要出埋掌擊退曾江同「夾心人」胡楓，震驚全場之餘，又被網民狠評有博宣傳之嫌。網民除咗紛紛估佢哋係「演戲」定「火氣」，仲幫續集諗定人選，當中鍾Sir鍾景輝、盧海鵬、譚炳文等人亦成為熱捧對象，而藝人馬國明、王祖藍、陳豪、林峯四大小生則被睇中喺四十年後合作拍番套旅遊特輯！

《四個小生》續集人選

鍾Sir喺演藝界幾有地位就係人都知，咩都唔講都已經夠晒台型同霸氣，而盧海鵬就勝在轉數夠快，鬥口術嘅話一定佔上風！剩低嘅譚炳文勝在夠搞笑，必要時可做中間人，隔一隔道火氣。唔少網民仲大讚呢個組合分分鐘仲有睇頭過原版：「鍾Sir一向講嘢都大聲啲，到時可能同盧海鵬嘈到拆天，而譚炳文嗰陣就喺隔離唱番首歌，緩和一下氣氛，到時就又有真實感又不失和諧啦！」期間，仲有人幫譚炳文諗定「緊急關頭」應該唱咩歌：「自悔輕佻講錯話～～」依～呢首咪就係譚炳文同李香琴合唱嘅《你回來吧》！話時話，計嚟計去都係得3個人，咁咪冇人揸咪囉？

未來4小生

而馬國明、王祖藍、陳豪、林峯四大小生則成為40年後網民最想睇嘅組合，期間更有網友留言話祖藍一定係擔當Joe Junior嘅角色，亦有一大班「花生友」要追求互窒嘅真實感，因而選出「鑊氣十足」嘅李錦聯同大王（安德尊），仲將佢哋代入埋謝賢同曾江：「大王代入謝賢角色，訪問時打李錦聯，好似會係咁。」

網民有話兒：

fxxrienxxxs：王祖藍咪Joe Junior個角色？

火光xx：冇李錦聯大王唔使睇！

x袍大x：譚炳文：自悔輕佻講錯話～～

樓上的xx：鍾Sir一向講野（嘢）都大聲啲，到時可能同盧海鵬嘈到拆天，而譚炳文果（嗰）陣就係（喺）隔離唱返（番）首歌，緩和一下氣氛，到時就又有真實感又不失和諧啦！