Amanda S.心痛餅店結業：四年冇私人時間

名模Amanda S.穿上deep V連身裙出席商場活動，側身時不慎露出bra邊。

久未在港露面的她，透露過去三個月大部分時間都不在港，並返了家鄉法國探望家人及朋友。她說：「我今朝先返到香港，我呢四年都冇乜返屋企，真係好需要呢個時間。」提到其餅店結業，有沒有新動向？她坦言自己亦是從經理人口中得知餅店結業的消息：「我經理人send message畀我，我當時都唔知間店執，都係睇報道先知。（會唔會怕咗做生意？）我唔介意再做生意，不過唔可以事事自己落手落腳做，加上租又唔平。我當時係做埋manager，四年來好多嘢都自己做，搞到冇咗自己生活。喺三月嘅時候，有人想買我間舖，我諗why not？加上嗰個人另外都有做飲食生意，我覺得OK，所以當時我只係淨番好少股份。（少過10%？）我唔可以透露。但係到咗五月頭，我就正式離開咗間餅店，因為當時我完全唔知餅店嘅運作，完全out of control，所以我決定放棄所有嘢。（清盤會唔會覺得好驚訝？）其實我四月試過send email問發生緊咩事，但完全冇回覆，可能佢哋有自己嘅計劃。（心痛？）我聽到呢件事，當然覺得心痛。不過我當時同家人喺法國，有三個月時間畀自己，我已經四年冇私人時間。（出面有冇唔知情嘅人追你債？）呢啲畀公司搞，經理人有收到電話，不過我哋講番已經冇股份，叫佢哋聯絡番新股東。（有冇蝕錢？）總括嚟講係好嘅，因為頭兩年生意好好，第三年開多間分店使多咗錢，但頭兩年賺得多。」

呻租貴人工貴

她又透露早前有朋友想找她幫忙做生意，只是當時太忙沒答應，如今可以看看有沒有合作機會，她說：「有朋友想搞飲品生意，佢搵我幫手做顧問揀唔同嘅口味，因為我呢四年成日接觸唔同嘅茶同咖啡公司，可以畀意見佢。（再做生意？）唔知，依家租同人工都好貴。不過如果再做，我都會用唔同嘅方法，要有個business manager，我唔可以做晒所有嘢，真係好攰。」

談戀情即笑晒口

當記者問她的六呎外籍男友有沒有令她很高興時？她即甜笑表示：「佢好好，我真係好幸運（識到佢）。（考慮結婚？）我已經結過一次，呢個唔係真係好重要，我依家好開心。」