洪天明冇打算追多個囡：唔想淨係賺錢養家

藝人洪天明於油塘宣傳新劇《拆局專家》，天明指太太周家蔚為他誕下細囝洪大義（JT）後生活起了大轉變，幾乎全職湊仔，他笑說：「依家大囝TJ（洪大仁）返咗學，要搭校車，每日都6、7點就起身送佢上校車，細囝JT都唔放心畀晒工人湊，兩邊行嚟行去，日日都係瞓3、4粒鐘，我都同自己講要慢慢放手，希望下一步係畀佢自己去搭車。」

抱錢嘉樂囡囡晒父愛

至於同場腹大便便的錢嘉樂太太湯盈盈則帶同囡囡錢凱晴到場，天明將凱晴抱在手中視如己出，晒出一副慈父冧樣，看來亦想再追個女！早前表示2個夠數的天明，被問到會否再追B囡？他即刻大改口風，說：「暫時唔會住，唔想淨係出嚟賺錢養家，小朋友就搵工人湊，自己都想親力親為陪佢哋，所要要再諗吓先。」

戥太太捲入風波感無奈

對於太太周家蔚的舊愛林建億再被影到攬女，家蔚更被拖落水捲入風波，天明無奈地表示：「每個人都有自己生活，唔影響到人就得。件事都過咗好耐，唔想太太再被拉落水。（家蔚唔開心？）唔知佢有冇唔開心，但佢已經係2個小朋友嘅媽媽，佢都係啱啱生完無耐，大家唔想佢唔開心，舒服啲，就唔好再拎嚟講。」