鄭文否認被nowTV炒魷

有報道指nowTV突然終止旗下藝人鄭文合約，而懷孕的鄭文亦不獲得產假補償，就此事《東網》向鄭文查詢，她表示：「本身同公司死約係到8月15日，原本仲有一年生約，但係我9月要生BB，而且我大女都四歲，雖然有工人幫手，但係我都唔想錯過小朋友嘅成長，之後要照顧家庭，我都未知將來會點樣，所以同公司有共識，生約就算啦！我同公司關係一向好好，（有指妳原本諗住做到9月18日nowTV嘅停廠日期，但係被提前Last Day？）我預產期係9月22日，我點可能做到18號？（點解冇喺最後一日同觀眾講Bye Bye？）好似我之前所講，我都未知照顧兩個小朋友會點，可能之後我會再喺幕前出現，所以無同觀眾講Bye，（產假係咪無得補償？）其實做得藝員邊有產假？我本身都預咗係No Pay Leave，只係依家直接放假，總之我同公司關係好好，之後可能會再有合作。」

而nowTV高層金廣城亦表示：「之前已經講過節目會重組，現階段係過度期，希望大家唔好胡亂猜測，而鄭文差唔多預產期，現時唔可以咁操勞，等鄭文生咗小朋友之後，會再傾合作一事，有新消息會公布。」