王菀之五度做老闆娘　開倉割愛！

歌手王菀之（Ivana）唱而優則演，原來佢做生意都好叻，今次佢再度做老闆開Pop Up Store，擺檔4天，以時裝、手袋為主打，佢仲會親自長駐喺店內，不過就要留意佢facebook先會知佢嘅開工時間。

今次已經係Ivana第五次過老闆娘癮，佢話：「今次真係開倉大割愛，因為勁多衫賣，春夏秋冬衫都齊晒，因為我之後冇時間再開，咁價錢就唔好咁快講住，我有一條絕版玫瑰花裙，好靚呀！仲有恤衫、T恤咁，其實有啲已經絕版冇得賣。另外，仲有意大利牌子嘅羽絨；日本牌子嘅大褸，有啲新到連價錢牌都未搣，又有少量全新男裝同埋布做嘅環保袋。」

為了答謝各方支持者，Ivana話會保持一至兩折的筍價，有啲仲會係免費，不過就要隨心捐錢，因為有某部份商品嘅錢會捐畀慈善機構。