鍾楚紅談斬樹激動傷心：啲樹喺度滴緊血！

大美人鍾楚紅（紅姑）出席護膚品牌舉辦的慈善攝影展，身穿deep v服裝上陣的她笑言大贈送：「健康就得。」

老樹被斬　紅姑：樹係要保育架

問到有否留意早前般咸道有4棵老樹，未被資詢就被斬下？她忟憎表示：「我好傷心，直情覺得啲樹喺度滴緊血，唔明白點解會有呢個決定，點解唔資詢我哋、對樹有認識嘅專家，依家斬咗棵樹見到佢咁健康就更加唔開心，樹係要保育架！唔健康就要醫，唔應該唔保育，壓到傷到人就喺度賴棵樹有病，點解有病唔去保育、醫佢，全世界每個地方種樹都嚟唔切，同埋樹係我哋嘅財產，唔應該斬同攞走我哋嘅財產。」

想為樹木發聲

她續表示希望可用自己的影響力來為樹木發聲：「做乜嘢都會做，任何代價都會付出！（同組織團體？）我想呀，但冇用，連專家嘅意見都被漠視，何況我哋。（如有團隊搵你呢？）一定樂意，我真係好傷心，呢啲係我哋香港人嘅歷史同記憶，斬咗就冇，百幾年嘅樹唔係樹仔可以代替。」問會否用相機影低樹木？她說：「我影咗好多係郊野公園，好不可思議同好怪嘅嘢，因為用咗好多錢去興建好多亭，但又唔用，唔可以擋雨、擋太陽，唔知用嚟做乜，浪費納稅人嘅錢，阻地方又影響市容，所以影低晒。」

反對取消電車

另談及有否留意有傳電車路段被取消，她表示有留意：「我反對取消，因為呢個係香港特色，事實上亦有用，又唔污染！（話電車阻塞交通！）巴士仲阻塞交通，我見巴士係空架，咁多架停晒喺路度，唔係話巴士唔需要，但應該要有計劃同啱啲嘅schedule，咁就唔塞路，令到啲車行得咁慢。」