【蝦殼都剝埋】唐詩詠貼心照顧寡佬馬明

4年前和無綫姐仔胡定欣分手後，馬國明（馬明）這個筍盤一出，即令不少姐仔流口水，唐僧肉個個爭住食。千挑萬選，去年馬明終於出貨，《東網》拍得他跟徐佳琦同車煙韌，當場野生捕獲，馬明頓變「騰雞明」口窒窒焗認戀情。可惜戀情僅維持9個月便玩完，死因是兩人年紀相差14年，因代溝而分手，而徐佳琦上月出席活動時亦承認單身，與馬明只是朋友。

好友送關懷

男神也有寂寞時，冇女友冇愛情滋潤，好彩有班朋友送暖！早前馬明偕同契妹唐詩詠、林子善、黃嘉樂及一名女友人現身大坑一間韓式海產店。與馬明排排坐的唐詩詠，現跟洪永城蜜運中，難怪不時笑騎騎冧滋滋，心情靚爆，真係抖啖氣都甜，並跟林子善及黃嘉樂恍如開籠雀般傾不停！相反寡佬馬明，不期然常常流露其「天然呆」本色，幾乎全程保持緘默，只是間中搭訕或陪笑一下。

主動遞紙巾

與馬明兄妹相稱、感情好到曾傳緋聞的唐詩詠，見馬明成個悶樣出晒嚟，不時主動搵偈傾，又為對方點菜。個個食火鍋都係自己落手落腳，反觀細心的唐詩詠，窩心到主動為馬明剝蝦殼，唐詩詠剝幾多，馬明就食幾多，真係爭在未餵入口，食到咁上下又主動遞紙巾，夠晒賢淑。

食飽飯後，一行五人到附近的餐廳繼續下半場吹水，馬明才開始稍為回復生氣多嘢講，間中都有展露燦爛笑容，至凌晨十二時許才散Band。陪伴男神的任務仍未完成，在餐廳只點了杯凍檸茶的唐詩詠，原來選擇做個安全的司機！離開餐廳後， 馬明跟林子善等道別後，二話不說直上唐詩詠的座駕。全晚細心照顧馬明的唐詩詠，為馬明為到底，載對方返回太古城的住所後才返家。