網民熱話：樂瞳轉形象　唔做純情學生妹

「新紮女神」陳瀅（Jeannie）近排為打破自己喺觀眾心目中嘅清純形象，決定豁出去影咗本全裸相集《半透明的舞孃》，當中與貓共舞嘅Jeannie仲大出「股惑」，引得一班網友鼻血直流之餘，仲令陳瀅嘅市場同戲路無限擴大！而另一邊，曾被網民推舉為「宅男女神」嘅樂瞳被發現近來亦不斷努力改變形象，唔再做「o靚妹」反而改sell女人味，更隨即令大批觀眾刮目相看，仲紛紛舉手讚好！

樂瞳自出道以嚟，成日都以校服、宅女、純情look示人，身形比較嬌小嘅佢加埋一副童顏樣，可愛感爆燈。而依家正值轉形時期嘅佢不時喺網上大晒誘人身材，妝容亦明顯濃咗唔少，但依然吸引大班捧場客！仲有人留言力撐佢依家女人味十足：「以前扮o靚妹，因為周街都花旦無咩特別。依家女人味濃咗，講白啲即係個形象姣咗啲咁。」當中更有網友推測，樂瞳之所以「大解放」，係因為佢知道青春有限，亦都係時候做番啲晒嘢擴闊戲路：「就嚟都30，佢可能唔想再演人哋阿妹！」

對於樂瞳嘅轉型之路，唔少網民都覺得好詫異，有人仲話佢唔止形象唔同咗，就連塊包包面都消失埋，隨即惹來整容疑雲：「之前佢塊面好多肉，依家係咪尖咗？」之後就有網民即時放上樂瞳嘅素顏照，大彈佢素顏趕客，美中不足：「係幾正嘅，但佢個素顏樣……好趕客喎。」

網民有話兒：

叔x：以前扮靚妹，因為周街都花旦無咩特別。而（依）家女人味濃咗，講白d（啲）即係個形象姣左（咗）啲咁。

點x成x：就黎（嚟）都三十，佢可能唔想再演人地（哋）阿妹！

xxx四子之首：係幾正嘅，但佢個素顏樣……好趕客喎。

我是一xx：車，韓妹妝，周街都係啦！不過我不嬲都覺得佢正。

能年xxx：之前佢塊面好多肉，依家係咪尖左（咗）？