林峯澄清冇被女友吳千語催婚
歌手林峯出席於澳門舉行的《英皇娛樂15周年和華麗有約澳門演唱會》,有報道指女友吳千語向他催婚,阿峯笑說:「冇,都『吹』咗好多次,唔係嗰個『催』,係咁多傳媒朋友太過關注,依家最主要都係工作為上,工作安排到出年架喇!」他又謂家人亦沒有催婚,他們只會關注自己工作上的安排。問到可有與千語BB討論過結婚?他說:「冇呀,其實一句講晒,以後唔好再問,我只係希望小朋友如果去到十歲嘅時候,我有力同佢打籃球同埋踢波,以呢個為宗旨!(考慮出年結?)唔話你知,因為我都未知!」
提到堂妹林夏薇早前低調結婚一事,阿峯亦坦言覺得驚喜:「我都係幾last minute先知嘅,不過恭喜晒佢!(將來學佢低調結婚?)呢啲嘢係同屋企分享嘅,如果傳媒朋友問我都會答你嘅。」
而講到工作,阿峯表示千語BB將要到韓國拍電影,而自己這個星期亦要到韓國拍攝與音樂有關的東西:「睇新聞嗰邊都好似幾緊張吓,希望冇事!(今年專注音樂?)因為出年四月底會喺紅館開騷,已經批咗,但未知開幾多場。(情況唔好取消?)相信唔會,亦唔希望取消,依家歌都七七八八,係差MV。」他又謂會與韓國的crew合作,看過日程表後發現當地的拍攝時間非常長:「要一日一夜連住拍,所以試吓體驗吓。」至於千語BB可有阻止他?他說:「冇呀,可能佢都未知,因為啱啱聽工作人員講先知,希望冇事啦。」