張敬軒內地拍戲遭苛索十萬人仔

藝人張敬軒（軒仔）與一眾小演員於深圳拍攝英皇電影《燦爛這一刻》，飾演拉丁舞蹈老師的他與小演員們感情要好，不用埋位時，一班童星又纏住軒仔攬實唔放。

談到早前於內地取景，軒仔大爆遇上「村霸」索錢！他指劇組事前傾掂以人民幣一萬八千元，向當地一戶農民租借屋企拍攝電影，後來屋主的家人反口，要求租場費改為人民幣十五萬元：「當晚都幾牙煙，搵咗公安同政府領導調解，最尾都要畀十萬蚊（人民幣），因為我哋冇簽合約，自己都有唔着嘅地方，起初當地好支持我哋去取景，大家氣氛都好好，香港劇組都係講個『信』字，諗住冇乜嘢。」

其後，有人更聲稱要扣留總值逾三百萬的攝影器材，軒仔說：「我覺得最唔舒服係，佢逼製片立紙、壓指模，我覺得乜事呀？乜年代呀壓指模？（嚇怕唔敢再去內地拍戲？）唔會，唔單止香港劇組，包括內地劇組，喺內地山區都會遇到呢啲問題，比較失望係佢哋當地機關都幫住當地人，因為我哋畀嘅錢足夠推冧佢間屋再重新起過，其實係好唔合理嘅費用，但又唔可以耽誤拍攝進度。」他又相信事件是屋主女婿的主意，並謂首日對方又生果又劏雞招呼劇組，軒仔說：「我由細到大都唔會隨便食人哋啲嘢，因為唔知會付上乜嘢代價，佢請食粥、生果我有話過敏，最後立嘅字條上面，佢打晒嗰啲嘢話係伙食費，但所有劇組人每日都食自己餐盒。（由第一日已經想博懵？）老屋主兩夫婦好好，佢哋唔似咁嘅人，可能係當地某個別嘅『村霸』。」

問到導演陳果為何找軒仔合作？陳果稱對方識唱歌又演過舞台劇，即使沒有足夠時間排舞，其舞台經驗能補救這個瑕疵，至少懂得走位與跳舞。他又直言跟小演員合作有難度：「我哋用咗成年，去唔同地方搵小演員，本來想搵20個，最後搵咗六個o靚仔，因為想專注喺六個身上。」