今年37歲嘅無綫藝人李璧琦（Becky），認為數字「7」同佢好有緣。Becky由2008年入行至今共7年，適逢今年又係佢擔任聲樂導師7年，佢話：「聖經入面，7係好圓滿嘅！而且彩虹亦係7隻色，我呢7年過得好多采多姿！」

因此，一直未有舉辦過生日會嘅佢，揀咗今年生日喺中環大搞生日P，佢話：「之前嘅生日都係同十幾個朋友食下飯、唱下K慶祝，從來都未試過搞咁大型、咁正式嘅Party！連我喺上海總會嘅學生都有專程嚟支持我！」

Becky又透露今次生日會邀請咗12位學生上台表演唱歌，佢話：「佢哋年齡最細得6歲，最大成70幾歲。有得上台表演，好多學生都興奮到瞓唔着啊！」另外，一向熱愛聲樂嘅Becky透露今年將會擺放更多心思去發展自己嘅聲樂導師事業。