龐卓欣戒咗夜蒲唔擔心影響決賽！

港姐進行三點式泳裝綵排，大熱之一4號龐卓欣（Ada）身型fit爆有馬甲線，但黑眼圈明顯，樣子疲倦。她受訪時說：「我一向有黑眼圈，同埋有鼻敏感，只係今日冇遮得咁徹底。（今日冇咁sharp？）唔覺！我愈戰愈勇！（有信心？）都有，但亦有預咗頭一、兩個被Foul嘅心理準備！」

「畀最真一面大家睇」

提到被爆料指她愛夜蒲攬仔，Ada承認四年前會跟朋友消遣，但現在已戒夜蒲：「好耐冇去啦！好多年前，都2011年，好奇怪。（因為選港姐戒蒲？）唔係，每個時期唔同，依家鍾意瞓覺同睇電視，都會約朋友飲吓嘢，就算飲少少酒都正常。（爆料者話你鍾意攬仔！）我個人比較活潑開朗，除咗男性朋友，都有女仔朋友架！（覺得畀人整蠱？）唔知，但有啲相我都冇。（冇嬲？）冇，都唔係做錯乜，同朋友玩吓咋。（驚影響市民投你票？）唔擔心，我畀最真一面大家睇，況且只係年輕時飲吓嘢。」

視麥明詩為勁敵

問到視誰為最大勁敵，Ada直言是中學舊同學1號麥明詩：「大家同一背景，佢識咩，我識咩，佢就叻跳舞，我就叻唱歌，一人叻一樣，佢理性，我就感性。（諗住點贏佢？）冇，最緊要贏自己。（有咩準備？）我成日帶住枕頭，隨時可以休息！」