周柏豪未計劃結婚　唔排除閃婚

周柏豪以代言人身份出席活動，席上與學員炮製蛋糕，柏豪透露很少入廚，他說：「唔係好識同唔叻，尤其手工穿線咁，真係0分。（好少DIY整嘢畀女友？）寫歌多。」當問到是否寫歌冧女，他說：「係寫歌冧女朋友。」問到是否公開女友身份，柏豪說：「冇否認過，只係一直低調，唔係好想講感情。」

問到兩人是否快垃埋天窗，柏豪說：「呢個係你猜測，結婚係大件事，亦冇計劃。（女仔唔等得？）得啦，等我哋兩個人處理。」問到會否閃婚？柏豪說：「答唔到。（結婚唔講？）冇呢個計劃，一直都低調，好少搬屋企人出嚟講。（公開對方有安全感？）睇對方想唔想，如果對方唔想我夾硬公開咩，總之我哋有我哋生活方式。（佢係咪好怕對住鏡頭？）其實我都怕對記者鏡頭，應該冇人會鍾意嘅，有好多攝影機對住，會嚇親佢，佢又係圈外人。」柏豪坦白每次出席活動都希望盡快收工，記者指他怕鏡頭，但又做藝人感矛盾，柏豪說：「度度都矛盾，食得鹹魚抵得渴。」