鄭中基孖顏卓靈譜父女戀：冇代溝

影星鄭中基（Ronald）、顏卓靈（Cherry）、周秀娜、蔡潔等到石門出席電影《大樂師．為愛配樂》開鏡儀式，片中飾演作曲家的Cherry即場演奏鋼琴，彈得有板有眼，她透露之前基本上不懂得彈琴，最近兩個多月才苦練。

片中Ronald飾演綁匪的朋友，Cherry則被對方綁架，並發展一段感情，Ronald說：「其實都唔算情侶，係曖昧，到最尾都冇一齊。（覺得兩個襯唔襯？）哈哈！你覺得呢？作為綁匪同肉參嚟講應該都ok。」43歲的Ronald今次與21歲的Cherry有感情線，問到會否覺得對手愈來愈後生？他說：「唔係，個故事係咁咋！綁匪要有啲經歷先做到嘛！其實係我啲朋友綁架佢，放咗去我屋企，之後Cherry不停點我做嘢，其實我係佢隻兵。（相處有冇代溝？）冇呀，點會有。」

問Cherry現實中Ronald是否她喜歡的類型？她想了一想說：「好幽默。」Ronald即說：「都話你識講嘢，神童。」

提到明天開學日，Ronald表示今晚會為升讀K2的女兒檢查功課：「聽日送佢返學，今晚早啲瞓，同埋幫佢check功課。（咁細個有功課？）有呀，但唔係好劇烈嘅，例如雜誌度剪啲蔬菜出嚟，咪又係叫父母做！（囡囡返學會唔會喊？）佢鍾意返學同同學仔玩，放學最尾一個走，好彩呢樣唔似我。」