黃建東殺入亞視為拍攝無意轉台

無綫藝人黃建東（Derek）早前正值亞視全球招募人才之際，殺入亞視，他說：「我都係第一次入亞視，平時真係冇機會踏足呢度，所以我去到都有周圍望吓、參觀吓，好想影相，但又唔敢貼出嚟，怕人誤會我跳槽，因為嗰次我入亞視係拍鄭中基主演嘅新戲《猛龍特囧》，我演警察，同石詠莉、蘇民峰、陸永係同一team人，好多謝監製田啟文同導演胡耀輝畀機會我，教咗我好多嘢，袋咗好多錢入我袋，雖然我第一次入亞視心情既緊張又忐忑！（有諗過過亞視發展？）TVB由我入行以來就畀咗好多演出機會我，我暫時無意轉台！」

Derek又指早前為相集客串模特兒，他說：「好多人笑我着長袖衫，啲鈕扣到上喉嚨，其他男模就打大赤肋，點解咁唔公平？其實我有苦衷，因為嗰期我有份拍攝無綫飲食節目《新派煮意》，我想展示我為食一面，唔覺意就食多咗少少，不過我依家已經跟楊明積極做gym、跑步減肥，希望明年可以除衫爆肌再影一輯！」