蔡思貝瞓身趴地露黑Bra 惹美魔男救駕
蔡思貝、吳啟華與譚凱琪日前於大角咀街頭拍新劇《純熟意外》,劇情講述譚凱琪遭求愛不遂的追求者意圖謀殺,她跟思貝在公司樓下被電單車撞倒,此時啟華突然出現英雄救美飛身撲救。拍攝期間,身穿白色鬆身衫的思貝,瞓身「趴街」扮倒地,一度不慎露出黑Bra和事業線,春光乍洩。
操腹肌做打女
談到電單車高速在身旁駛過,思貝卻未有擔心發生意外:「我好相信所有工作人員、武指、電單車手,佢哋個個都好專業,反而一驚仲會出錯,因為騰雞可能走錯位。(有買保險?)唔清楚公司有冇買,但由細到大屋企人都有幫我買,希望唔需要用。」劇中不乏動作戲,她稱不介意做「打女」,更笑謂:「如果畀幾個月時間我操吓,我唔介意練六舊腹肌出嚟。」
吳啟華迷倒自由行
有「師奶殺手」之稱的啟華,甫現身即引來大批內地旅客圍觀和拍照,令他不禁拎出手機拍下墟冚場面。現年51歲的他跑步、游水、踩單車操Fit拍劇,問有否練出腹肌,他笑道:「我呢啲老人家冇所謂啦,做過運動都有少少嘅,但冇刻意去健身房操啲乜。」他讚思貝聰明開朗,不似新人:「好多方面佢都幾老練,基本上都好合格。」提到六歲女兒於內地升小一,他自言不是嚴父:「細路仔唔需要讀書太叻,唔太差、合格就OK,見到啲細路讀得叻嘅好大壓力。」
有傳港姐冠軍麥明詩搭上排舞師麥秋成,亞軍龐卓欣爆麥秋成與緋聞女友思貝食飯,思貝坦承在公司相約「男友」食飯,又笑指「冇牆腳可撬」:「我同麥秋成係朋友,佢哋就唔知道,但相信唔會咁快,港姐排舞好短時間,佢哋一路好專心選港姐,如果用心選美都冇時間拍拖。」