被視為視后大熱之一的無綫小花胡定欣，大後日（9日）就34歲正日生日，踏入「黃金盛女」階段！去年年底她宣布與拍拖逾兩年、已發展到談婚論嫁的廣告界才俊沈栢淳分手，急於泊新碼頭的她火速撻着年長13年的資深音樂人陳明道（Terry），除了一同外遊relax，男方更帶女友一齊出席party，感情穩定的兩人發展至同居階段，好事近的她分分鐘爬好姊妹胡杏兒頭！

Say goodbye依依不捨

胡定欣更甘願為男友做「阿4」，決心一戒港女性格收斂臭脾氣！早前《東網》記者拍得她與Terry於下午兩時半左右離開女方寓所，定欣充當「柴可夫」駕駛其白色寶馬載返大陸出show搵真銀的男友到紅磡火車站轉乘中港直通旅遊巴，她將車停在上落客區未有落車，與男友密密訴心聲足足十五分鐘，難捨難離下唯有於火車站再兜多個圈。再次駛進上落客區時，Terry單拖落車到車尾拎結他及行李，再與定欣say goodbye又細心示意女友小心駕駛，素顏的定欣拉下車窗與男友深情對望，更依依不捨望實男友離去的背影，認真眼冤。次次畀仔飛的她為免再臨門撻q，實行管接管送箍愛郎，擺明ready做賢妻！

等杏兒嫁先

問到定欣是否經常擔任男友的「私人司機」時？她接受《東網》電話訪問時甜笑認與Terry會互相照顧：「一齊得開心，都幾sweet嘅！唔係話車出車入，我哋會『互車』。（係咪同居呀？）都冇，佢自己有住嘅地方，我就住番將軍澳，近公司嘛！」對於好姊妹胡杏兒年尾嫁人，她笑言：「唔會爬頭啦！我哋都睇佢頭，想佢快啲結婚，唔會超越佢嘅。家姐佢嫁人，我哋做細妹緊係等埋佢先啦！（杏兒會唔會sponsor你婚紗呀？）如果我有呢一日，我相信佢會全力支持。」她又表示未plan婚姻大事：「依家開心最緊要，將來嘅事遲啲再算啦！（會唔會好似林夏薇咁閃婚呀？）冇呢個念頭喎！」適逢Terry今日47歲生日，一眾好友都在其instagram留言送祝福。