宋熙年恨擺三次酒　陳智燊聽到滴汗

藝人陳智燊（Jason）及宋熙年自從訂婚後首次合體現身銅鑼灣出席活動。問到「準夫妻檔」上陣的兩人會否獲更多酬勞？Jason笑言要詢問經理人。

談到二人是否年尾擺酒？Jason直言「快得滯」：「要同家人夾時間，我父母喺英國，熙年父母喺澳洲。兩位媽咪見過面，但成家人未見過。」而熙年直言要視乎雙方家人要進行那種傳統儀式。問到婚禮是否於香港舉行？Jason說：「係呀，想同大家慶祝。（婚紗相喺電視城影？）要問樂小姐（樂易玲）同相關部門，希望冇難度。可能大家覺得好娘同搞笑，但對我哋好有意義。（出國再影？）香港街景都好。」

而熙年笑言若時間成功配合，希望於悉尼、倫敦及香港三地影婚紗照。問到他們是否打算分別於三地各辦一場婚禮？Jason聞言扮擦汗，又笑稱要先計數：「計一計條數先，能力範圍所及會做。」而熙年就開口表示最理想於三地擺酒。

有指他們於馬鞍山月租兩萬三愛巢趕快造人？Jason笑說：「趕唔到，結咗婚先plan （生）B！」而熙年笑稱要按步就班，故暫時不會有其他喜訊宣布。Jason搞笑搶白：「一定冇意外！」

提到無綫明珠台不再為節目或電影進行配音？Jason直言冇聽過，又稱不清楚公司決定。提到樂易玲被指離巢過檔邵氏？Jason說：「未聽過，返去了解吓。（如果挖角搵你拍戲？）都想，不過拍劇畀咗好多充實嘅訓練我，keep住拍劇就可以遲啲去拍戲！（同無綫合約幾時到期？）幾年！」而熙年直言與無綫尚有一年合約，她又明言即使婚後亦會工作，不想與社會脫節。