為娶張嘉兒　新郎哥甘願食蟲蟲

前港姐冠軍張嘉兒於溫哥華時間九月十二日下嫁圈外男友Nate，兩人的親友均從香港、美國等地飛往溫哥華觀禮，好友戚黛黛則擔任圈中代表到當地赴宴。

手指脹戴唔到戒指

一對新人於下午先在當地教堂行禮，戚黛黛透露整個過程非常感人，令大家紛紛感動落淚，她說：「嘉兒翹住爸爸步入教堂，佢一行入嚟就開始有少少流淚，到讀誓言嗰陣，基本上都超級感動喊晒，成班姊妹、一對新人都眼濕濕。」她又大爆行禮時的蝦碌事：「嘉兒幫老公戴戒指時，好難塞得入對方隻手指，因為綵排時教堂啲人都話，緊張嘅時候手指會脹，如果未能順利塞入去都係正常嘅，結果到正式婚禮時，佢老公隻手指突然脹咗好多，嘉兒用咗好多時間、好盡力先可以戴到上手。」

晚上，一對新人又於酒店舉行西式婚宴，現場約三百名賓客出席，場面盛大！期間，兩人分別向對方及家人說謝詞，向來講開英文的新郎卻「被迫」轉Channel，戚黛黛笑謂：「當新郎多謝嘉兒嘅家人時，嘉兒要佢講中文，佢講得好好笑，因為佢中文唔係好好，突然要佢講都翻譯唔切，幾深刻、幾得意。」席間又播放了嘉兒為老公偷偷製作的驚喜短片。

之後，嘉兒與Nate更大騷苦練多時的舞技，新娘子穿上高衩晚裝，相當性感！除了傳統的抛花球環節外，新郎哥更用口將嘉兒的襪帶，從對方大髀慢慢往下脫掉，然後再將它拋給在場男士！

玩食蟲勁核突

此外，身為姊妹團之一的戚黛黛又大爆「玩新郎」的核突遊戲，其中，一班姊妹準備了六份「加料早餐」，將貌似曱甴的「豉汁蟲蟲」、乾蟲等放於食物上，並要求五位兄弟、伴郎及新郎進食：「班兄弟好配合，好快就食晒！」問到開門利是幾位數？她笑謂：「數目唔講啦。但我哋班姊妹都非常滿意，好開心。」

「東網巨星」fb專頁：

每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。