網民熱話：麥浚龍的黑白世界

早前歌手麥浚龍（Juno）以「羅生門三部曲」紅爆網絡，近日再與「型爸」周國賢合作推出新歌《雷克雅未克》，有人猜測《雷》係羅生門故事嘅外傳，再次掀起網民注意！《雷》MV貫切以往灰暗陰沉風格，以黑白色為主調，而且以一鏡到底嘅方法拍攝，同之前風靡一時嘅《羅生門》MV有異曲同工之妙。對於Juno呢份獨特嘅表達方法，有網民就開玩笑咁話：「其實Juno係咪色盲架？」

網民仲搵嚟Juno「色盲」嘅證據，第一就係佢個人Instagram近年上載嘅相有99.9%嘅相都係黑白色！有細心嘅網民留意到Juno近年喺Instagram上載嘅內容都玄到爆，不但相片只有黑白色，就連留言都令人百思不得其解，例如三星期前佢就話：「be joyful, since we are all suffering.（開心點，因為我們都在受難。）」兩個月前又講過一句：「the overrated sun.（高估了的太陽）」睇怕可能只有Juno肚入面條蟲，先明白佢講乜嘢喇！不過，有時Juno都會偷雞唔用黑白色嘅，好似原來早喺一年前，佢仲放過一張有藍色嘅相，當時佢仲話：「a kind of blue. （某一種藍調。）」對於Juno呢種陰沉嘅性格，網民就推測：「佢只睇到人嘅灰暗」、「Juno冇乜安全感，唔相信有色彩」但都有理性嘅網民就以科學角度解釋：「好簡單，因為佢係色盲！」

近年Juno嘅作品不論畫面，定係題材上，都以灰暗陰沉為主。例如由自編自導嘅2013年電影《殭屍》，畫面暗黑而且劇情令人不寒而慄，但電影就叫好叫座。至於佢喺2010年推出歌曲《超生培慾》，MV中雖然冇血腥情節，但題材講到Juno化身為殺人魔，畫面營造做一份恐怖意景，有網民更以「變態」嚟形容Juno嘅內心世界。不過，都有唔少網民表示懷念佢以往嘅「彩色世界」，好似佢初出道時出演無綫劇《律政新人王》，飾演反叛角色，但始終畀人感覺青澀樂天。但經歷過多年喺娛樂圈嘅浸淫，佢至今嘅世界已經變得只有黑白色，網民都話好無奈！

網民有話兒：

摩托XX：juno只睇到世界嘅黑暗一面！

老XXX：其實我幾buy黑白，唔知係咪我太鐘（鍾）意黑色，日日出街都係黑色patterned tee，唔洗（使）諗又點著（着）都得。

XXXX散：Juno有d走火入魔。

進藤XXXX：你地（哋）錯啦，55週前juno有張相係有藍色既（嘅）！

做人XXXXX型：係咪你色盲，我睇到juno有顏色嫁！