何雁詩凌晨社交網站大方認愛

最近，藝人們都好似有鋪癮咁，鍾意凌晨先喺社交網站公布啲消息，無論結婚、大肚、甚至分手可以話係咩都有，可能貪夜晚夠晒靜，撳粒制之後就可以去瞓覺。

陳偉霆（William）同蔡卓妍（阿Sa）昨夜凌晨就喺微博上發表聲明，宣布分開，結束維持咗五年嘅情侶關係，正所謂有人歡喜有人愁，相隔一晚，又係凌晨，再度有人喺網上公布消息，今次輪到拍完無綫劇集《四個女仔三個BAR》爆紅嘅何雁詩。

入行7年一直鮮有緋聞嘅何雁詩深夜喺IG發表英文長文，公布自己拍拖嘅消息。內文提到佢非常慶幸有呢位男友陪佢走過所有嘢，亦唔介意直接同大家講佢已經同緊一個好似「白馬王子」嘅男友拍拖，仲話就算佢哋兩個未結婚，亦未生小朋友，但已經好感激每一日有對方相伴在旁。叫得男友做「白馬王子」，睇嚟呢位男友真係好啱何雁詩心水，兩人亦晒出一張甜蜜合照，可以話係幸福滿瀉，最後何雁詩仲叫大家唔好騷擾佢男友同佢啲家人，因為佢哋唔係圈中人，就憑呢幾句就知何雁詩有幾鍚佢男友啦！

「東網巨星」fb專頁：

以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。