盈盈9個字順產7磅B女 嘉樂獲讚熟手
藝人錢嘉樂以主席身份出席「香港動作特技演員公會活動」。談到他與老婆湯盈盈再添一女，他就指凌晨睡覺中途被老婆踢醒，說：「嗰時就話『係咪真架？好似係真架！』」所以就立即刷牙洗面，手執「走佬袋」飛車到醫院兼Call醫生及麻醉師。陪着老婆入產房的他就指自己全程安慰對方，他說：「由踢我起身嗰吓到生出嚟就全程1個鐘零17分鐘，入產房9個字左右就順產咗，因為佢鍾意自然分娩。我覺得個女好聽話，因為23號呢日要搞『香港動作特技演員公會』記者會，就咁啱凌晨就出世，好叻。自己套戲又煞科，撞埋一齊就唔知點算喇。」
中文名未定
嘉樂透露B女足重6磅15安士，他說：「之前又話會早產，就諗唔會23號咁啱掛，點知真係23號。」他又指囡囡改名作Kassidy，問是誰改名，他笑謂：「你話呢？太太都好體恤我，啲名改咗我讀唔到，佢都話『唔用呢個喇，你都讀唔到』。」但中文名則未決定，或者爺爺改：「睇吓會唔會跟個凱字。」
被醫生讚熟手
他又指自己在產房時都有幫手剪臍帶，說：「連醫生都讚我熟手咗！（諗住再生？）睇太太啦。（自己想唔想？）停一停啦，屋企連埋外傭有四個女人架喇。」問B女似爸爸或媽媽，他笑謂：「我就梗係覺得似我自己架啦，不過媽媽就話今次個女唔似佢條氣會唔順。」又笑言妹妹似家姐。至於會送甚麼禮物予老婆？他說：「未知呀。（鑽石、樓？）啲樓都入晒佢名啦，都冇分架喇，冇所謂。老婆都好勇敢，送咗兩份大禮畀我。」更大讚老婆好叻，入院前後全程自己行。問他有否感動喊，他說：「太太就有，佢感動到喊。我就上次就有，今次就冇，因為好緊張。」
「東網巨星」fb專頁：
以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。