汪峰現身美國賭場傳章子怡待產
早前章子怡未婚夫汪峰被指涉及啤牌賭局，由於事件牽連甚廣，汪峰即時企出嚟澄清洗脫嫌疑，不過汪峰似乎無擔心過，周不時都會喺網上見有網友甫相，話見到汪峰喺某某賭場出沒，啱啱又有一批新相出現，據傳今次嘅地點係洛杉磯，相中所見，頭戴CAP帽全黑打扮嘅汪峰全神貫注睇緊牌，雖然唔係好正面，不過從佢憂鬱嘅眼神，加上唏噓嘅鬚根，同埋佢頂寫住「WF」嘅帽，而「WF」正正就係汪峰嘅拼音縮寫，呢啲種種迹象就完完全全出賣咗汪峰嘅身份。
相片未有見到章子怡嘅蹤影，被傳懷孕嘅章子怡一直有指佢會去美國安胎，咁啱汪峰又喺美國出現玩啤牌，一眾網民即刻聯想章子怡離產期不遠，消息是否屬實就未得到兩方面確認，不過懷孕都係十個月，係真定係假相信好快就會一清二楚。
「東網巨星」fb專頁：
以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。