陳豪出席活動時身型看似比之前瘦了，但他笑指自己沒有瘦，反而重了兩磅，又謂太太陳茵媺（Aimee）也不覺得他瘦了。

談到Aimee現正身在馬來西亞拍劇，問到他有多久沒見太太，他說：「我哋每日都有視像見面。（中秋要分兩邊過？）係呀。（太太咪會好掛住啲小朋友？）會呀，每日唔見過唔心安，佢梗係想快啲返嚟。（你一個搞得掂兩個細？）ok，無問題，第一個嘅訓練已經好足夠。（佢哋有無扭計要媽咪？）有呀，黐媽咪黐得好緊要，爹哋頂住先。（Aimee都好掛住佢哋？）佢一直未出嚟做嘢住，就係因為掛住啲小朋友，今次去嘅時間唔係太長，眨吓眼就返嚟，ok嘅，可以畀佢過下戲癮。（你呢？）我無所謂，永遠支持佢，不過睇佢自己都應該會唔捨得啲小朋友。（你同TVB完約未？）我ok，同TVB仲有好長約。（加簽咗好長？）我啲合約都唔短。（仲有幾長？）夠喇夠喇。（咁有無再加簽？）無無無，本身份約都唔係短，ok㗎，其實我覺得合作形式重要啲，合約長短有咩所謂。（咁咪無得同太太一齊唔續約？）我續咗好耐。（無得陪着佢走？）太太一路喺我身邊，我同佢已經成為一體，一家人嚟嘛。（唔面紅？）再問我就面青。」

問到知否樂視都會開劇，陳豪說：「都聽到好多呢啲新聞，講到尾自己作為演員，如果合作得好開心，無離開嘅需要。（如果酬勞好好呢？）錢唔係唔重要，但自己唔會太着眼喺錢方面，最重要係發展前景，機會同合作方式，依家順風順水，大家開心，做咩要去改變？（傳聞話你仲有一年約就走？）唔係，無啲咁嘅事。（叫埋太太一齊留低？）我幾難答，我係一個父親，作為一個爹哋，我當然想媽咪陪多啲小朋友，相處時間可以多啲。但作為一個fans，就會想佢拍戲，所以要搵到個平衡。如果小朋友太長時間無得見媽咪，我都唔想。」