網民熱話 :梁朝偉電眼廣告冧死人

20150926
東網電視
更多新聞短片
朝偉真係魅力沒法擋呀!
影帝梁朝偉一雙迷人電眼極之深入民心,唔少粉絲睇佢做戲嗰陣都會不期然畀佢嘅眼神電到暈一暈,近日朝偉嘅電眼大型海報喺內地出現,雖然張張海報都只係得佢雙眼嘅大特寫,不過粉絲一睇就睇得出對眼係屬於朝偉嘅。而佢用眼神做戲嘅電視廣告尋日亦喺內地熱播,仲吸引20萬網民熱烈討論呢個廣告,有網民就講笑話依家睇戲唔止睇「顏值」,就連「眼值」都要睇埋。
呢個長約三分鐘嘅內地護眼產品品牌廣告,唔止係由好耐冇喺廣告出現嘅朝偉代言,仲出動埋大師級嘅製作班底,分別由著名攝影師夏永康執導及著名美指張叔平擔任美術指導,認真威威。而最勁嘅係,朝偉喺呢個廣告入面只係動用佢對眼同一把迷人嘅聲線,廣告末段佢仲使出單眼絕技,將一眾粉絲電到暈晒!
唔少網民睇完個廣告,都大讚朝偉顏值高,眼值更高,仲話朝偉帶起用「眼技」做戲嘅新潮流!呢個廣告昨晚喺內地各大網站同電視台播放,唔少網民喺電視上見到梁朝偉,都忍唔住要攬攬部電視,仲有人對住電視入面嘅梁朝偉大擺心型pose;而佢嘅眼部特寫宣傳海報喺內地車站燈箱出現後,已經吸引唔少人去對梁朝偉嘅海報行注目禮,唔少網民更對住海報做出各種得意表情同姿勢,可見佢對眼嘅威力有幾驚人!
網民有話兒
kic_xxxg: 這眼技真是感動得讓人不得不愛啊!
chaxxxntan:影帝對眼真係唔講得笑!
qqmx:就要被他的大眼睛電暈了,快救我
請叫我XXX:梁朝偉是我心目中的男神,他的眼太有魅力了
tu_xx9:這麼多年就是喜歡看梁朝偉的眼睛,好迷人