傳撻着吳業坤　堅嬲龔嘉欣：要同佢割席

藝人龔嘉欣到荃灣出席無綫新劇《無雙譜》宣傳活動，提到早前有指她與在無綫處境劇《愛‧回家2》中飾演自己弟弟的吳業坤暗中撻着萌生姊弟戀，嘉欣即時鬧爆畀人「砌生豬肉」！她笑言：「佢話我愈食愈奀，我唔鍾意個『食』字，今次真係有啲嬲。」之後更直言不喜歡「弟弟」，獨愛熟男，她說：「我鍾意啲成熟啲嘅，照顧到我，今次真係要同佢（吳業坤）割席先得喇！唔想成日寫我咁多緋聞，係真嘅唔怕講，但今次我覺得過份，當係一個宣傳啦！（快啲搵番個？）你睇我眼袋幾大！日日瞓得幾個鐘！無時間！」

嘉欣又表示現在《愛》劇工作愈來愈忙，更密羅緊鼓要與何君誠及張振朗談情，又透露最近與其中一人拍攝親熱戲，笑言：「劇本就話蜻蜓點水，點知導演無嗌cut，我當時無諗咁多，專業行先，結果錫咗十幾個take，我仲問佢係咪畀咗錢個導演！不過，我睇番都覺得好sweet好浪漫，好耐都無呢種感覺。」

「東網巨星」fb專頁：

以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。