娛樂專題：獨立歌手Yukilovey的煩惱

今年24歲的Yukilovey（勞嘉怡），年前開始拿着結他在網上自彈自唱，成功吸納不少粉絲，繼而獲本地音樂人何兆基（Chris）賞識，邀她為其樂隊獻聲，再獨立出碟。但享受自由的同時，她承認也有煩惱。

對於外間有好反應，Yukilovey說：「開頭以為冇咩人會買碟，所以第一批只有五百隻，但都代表有五百人聽過，對我已經係一個好大鼓勵，我又唔算主流，唔多人識，冇諗過會有人買我唱片。」18歲首度拿起結他的Yukilovey，憶述首次作曲的經歷：「寫第一隻歌係18、19歲時，唔記得係父親節定母親節，當時冇錢買禮物，於是就寫歌畀佢哋，寫咗咪唔使用錢囉！後來連送禮物畀以前男朋友都係咁樣，方便又快捷。」

唔知自己想點

一直我手寫我心的Yukilovey強調，會堅持以獨立路線發展：「同何兆基合作So Far我覺得好開心，幾自由，好啱我性格。雖然一直有主流唱片公司搵我，但我覺得依家咁比較開心。我覺得最緊要係可以做番自己，如果簽咗主流公司，要我做一啲同人哋一樣嘅嘢，其實都唔需要我，人哋都做得好好。」認清自己路線的同時，卻又帶給她另一個煩惱：「其實一直做歌都冇咩計劃，啱就做。到依家心態有少少唔同，第二隻碟開始會諗，第一隻就話講青春，到第二隻大家係咪有期望呢？所以都會煩惱，因為唔知自己想點。」

讚陳綺貞文筆好

在討論區上有網民拿她和創作女王陳綺貞相題並論，Yukilovey說：「呢個名好大壓力，我好鍾意佢嘅作品，對我寫歌都有少少影響，但我當然幼嫩好多，佢嘅文筆好好，我仲有好多嘢要學，所以除髮型外，我一啲都唔似佢。」除陳綺貞外，麥浚龍和盧凱彤亦是她欣賞和學習對象。

唱歌教畫各佔一半

要全心投入創作，她坦言需要家人的支持：「做音樂係我Part Time，其他時間我教小朋友畫畫，對我嚟講唱歌係半份，畫畫係半份。但唱歌同畫畫有時收入會唔穩定，反而屋企人會成日鼓勵我，話做做吓就會愈嚟愈好，好感激佢哋支持，見到網上反應好，都替我好開心。」

姓名﹕勞嘉怡（Yukilovey）　出生日期：3月16日

作品：2012年以獨立樂隊The Lee's身份，推出《白色太陽槍》專輯，2013年為樂隊壞碑唇的《雷克雅未克的情書》和《日不落的一天》獻聲，其後以個人姿態在網上推出《謝謝你的殘忍》、《小綿羊的氣味》及《抓緊青春的尾巴》等多首創作單曲。