洪永城猴擒攬陳凱琳 陳展鵬：我想打佢
藝人陳凱琳（Grace）、洪永城（Tony）、陳展鵬及傅嘉莉等到寶琳宣傳新劇《張保仔》，眾人以劇中造型亮相。
大會播放劇集主題曲MV時，引來fans尖叫，輪到Tony在大屏幕出現時，Tony亦嗌埋一份，被傳不和的展鵬取笑說：「邊有自己嗌架？」Tony即推說尖叫聲是Grace發出。Tony與Grace玩遊戲時示範人工呼吸，Tony竟猴擒將Grace一攬入懷，Grace起身後搵水淋Tony，展鵬批評Tony說：「戲入面係咁啫，現場都咁，人哋爹哋媽咪喺度架！」
展鵬之後與Tony比賽拗手瓜，蔣志光雖然醒水地用紙牌遮着兩人手，以免輸贏有比較，但側面睇卻見到展鵬拗贏，到蔣志光拎開紙牌供傳媒影相時，展鵬則讓賽，與Tony四手互拗，營造不分勝負的畫面。
展鵬被問是否有心讓賽，他說：「咁我係佢前輩嚟，玩吓啫，多啲後浪出現係好事，最好推到我上岸，咁我就唔使做。（畀說話Tony聽？）唔係，跟番Tony個tone啫，佢都叫我鵬叔！（嬲？）唔嬲，我個姪都叫我阿叔。（當Tony係姪？）佢本來叫我鵬哥，但依行鵬哥得一個，就係盧海鵬，咁佢就叫咗我做鵬叔。唔緊要，我哋都係順應大家鍾意睇嘅去發展。」
展鵬又笑言想打Tony，他說：「我想打佢，係真打，佢咁招積，過多幾個禮拜就打。（有冇教Tony做戲？）佢使乜我教？計埋依套，佢拍第4套，如果咁都吸收唔到，好難再上，嚟梗佢都做主角喇！」
「東網巨星」fb專頁：
每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。