藝人吳千語出席韓國文化活動時，即席打鼓及玩韓國傳統遊戲。她透露中秋節與男友林峯帶同愛犬一同到朋友家打邊爐。問她何不二人世界？她說：「人多熱鬧啲，兩個人食都悶，冇乜特別。（成日一齊食所以悶？）見嚟見去都係嗰啲，自己鍾意熱鬧啲。（佢鍾唔鍾意？）都鍾意。」

她透露自己將到韓國拍攝電影，並與韓星李敏鎬合作，到濟洲島一至兩個月。問到林峯會否探班？她回應：「未必會。（小別勝新婚？）都成日別。」她表示雖然屆時會有翻譯人員在當地幫忙打點，但自己會預先學一點基本韓語，以及於手機中下載中韓翻譯軟件，以防溝通出現問題。問到她的朋友有否拜託她拿李敏鎬簽名？她笑言：「有問，就連我睇牙嘅姑娘都問我，大家都好激動。（你自己會唔會都想要佢簽名？）我唔洗，會唔好意思，都係叫我助手問佢攞。都有啲年長嘅親戚問我最近點，又知我要拍戲，好清楚我近況，好好笑。（有冇鍾意邊個韓星？）全智賢同車太鉉。李敏鎬我都有睇過佢嘅演出，啲打戲做得好好。（林峯靚仔啲定李敏鎬靚仔啲？）唔好講比較，講邊個都死，各有各嘅魅力。（林峯對住你嗰陣最有魅力？）同一個人生活，會感受到唔同嘅魅力，好似認真、成熟嘅魅力，唔淨係外表嘅魅力。」