娱乐专题：姜皓文日日为老婆送惊喜
20151001
东网电视
更多新闻短片
姜皓文坦言年轻时浪费不少光阴，在自己的坚持下，现时终冒出头来。
在圈中浮沉多年，直到《证人》令姜皓文（黑仔）为电影人所熟悉，剧本接踵而来。他坦言当年“细路仔唔识世界”浪费了不少时间，但懂得坚持令他终挨出头来，更被封“绿叶王”！除扮演观众既定印象中的“黑社会大佬”，近年多次饰演“慈父”的他与老婆结婚十五年无所出，原来他已习惯享受二人世界，并把家中宠物视为儿女，自言太爱老婆的他每天都想为对方制造sweet爆小惊喜！
老婆爆粗即收声
一提起老婆殷宁（原名金慧英），黑仔即展现出“铁汉柔情”的一面。
“结婚15年又冇话点keep，老婆好锺意新鲜感，我就尽力配合，开个饭都搞到每日去咗新餐厅食饭咁！佢一直都好支持我，系全世界最包容我嘅人！我喺出面有咩事，返到嚟又呻又发晒脾气，心情唔好我真系返到屋企成日拎嘢嚟嘈，仲嘈到歇斯底里，佢都仲系一样咁包容我！佢由一个斯斯文文嘅女仔，到学识咗讲粗口都系因为识咗我，依家佢一忟一讲粗口我就识收声。
我真系要好好对佢，我有咩都会畀最好嘅佢，谂乜都要以佢为先！又唔使话点样多谢佢，就继续对佢好啰，冇办法啦太爱佢喇！成日都想畀surprise佢，唔想再好似以前咁，畀旧钱叫佢自己买礼物畀自己喇，好似早几个月前过咗15周年，我就搵朋友教我，亲手整蛋糕送畀佢！我做过好多慈父角色，但冇生小朋友，冇去特别谂过呢个问题。自己啲细佬妹全部都有小朋友，太太嗰边嘅亲戚亦一样。依家对住啲宠物都够头痛，我几忙都好都会抽时间同老婆一齐照顾班宠物，所以平时我好锺意留喺屋企。”
叹虚耗光阴
1986年参加亚视《电视先生选举》，夺得亚军后入行，转眼接近30年，黑仔承认自己虚耗太多光阴。
“入行成30年，近呢几年好多戏接，我唔觉呢个‘高峰’嚟得太迟！好多嘢都系讲timing，唔到你就唔到你，最紧要我坚持，一日喺度我觉得排队都轮到我啩？由(靓)仔入行到依家，无可否认我行咗好多唔可以叫系冤枉路，但当时心态系玩玩吓，有心机做戏但冇人指点我，去教我条路要点行，就乱打乱撞咗起码十几廿年。我冇后悔过！以前喺电视台年年都好多嘢做又爆show，搞到我从来冇去谂要出去闯，如果当时识去冒险，可能依家嘅我又唔一样。”
慢热碍星途
圈中跌跌碰碰，性格过分慢热令黑仔被质疑没有成为演员的“格”。
“自己都曾经觉得唔啱入行，身边有人讲过我性格问题！我个人好慢热同内向好多人就畀我个样吓亲，正一鳄鱼头老衬底！你畀剧本我我就去做，有行家都叫我谂啲嘢出嚟畀佢写吓，我话冇喎！原来佢哋叫我作啲嘢出嚟讲，我先知‘啊！乜系咁架？’啲人都话我唔识做呢行，我都觉得佢讲得啱，但我又继续行自己嘅路啰！依家多咗嘢讲已经好咗架喇，以前我升到中一，小息先识行出课室，都只系因为做咗风纪咋！以前都系落去买串鱼蛋买支奶又走番入去坐。”
拍戏满足感大
终于由电视框跳到大银幕，黑仔坦言要拣一定拣拍戏！
“由电视台走出嚟拍戏，学识咗好多电影知识，好多嘢唔同电视。首先客路已经唔同，我拍咗电影咁多年，依家去入油都有阿姐同我讲‘咦？你冇拍嘢喇喎，你系咪转咗行？’我明明拍咗好多戏点解佢会咁问呢？原来佢哋唔会嘥钱睇戏。你话入屋就当然系电视，行出街又多人认得你，好深入民心，电影就慢热好多，但系畀到更多实在嘅得着我，满足感亦大好多，所有制作都好细微！试过拍咗一排电影，返去拍电视剧自己都有啲唔习惯。”
感激伯乐提携
电影界发围，都要多得看得上你的伯乐。
“演艺生涯入面，我嘅转捩点系林超贤导演嘅《证人》，开始咗令电影人认识我同留意我，虽然我喺入面戏份唔多，但佢好畀心机去指导我点做好呢个小角色，可能好多人都唔会好似佢咁，咁细腻去同你讲戏，真系要好好多谢佢！另一位导演我亦要好感谢，就系杜琪峯导演，佢都系一个好识指导演员嘅大师！”
睇好张继聪
自觉未够班的黑仔未敢指导后辈，但直言睇好张继聪及王菀之。
“要入戏去做一啲现实生活唔会做嘅角色，会上网搵吓资料啦，亦有老前辈教我周街行，周围望，真系好有效！同埋唔好熟读剧本，最好接咗返嚟望吓就算，去到现场先再睇，真系work，嗰阵时读会好新鲜！最近我几欣赏张继聪，佢好特别，有一套自己嘅节奏但又几好睇，同佢合作嗰阵自己未埋位都会好留心睇佢拍戏。同埋王菀之啦！真系一个好演员，佢好勤力，亦好平常心咁去做戏，愈淡就愈好睇，就好似佢咁唔需要好用力咁去做。”
后记：难忘跳七次楼
问到作品无数的黑仔，要挑选最难忘的拍戏场面时刻，他说：“真系要数《杀破狼II》嗰场逃亡戏，当时喺新码头拍一场畀警察追杀嘅戏，一日之内我由8楼跳楼跳咗7次，再加跳海跳咗8次，简直系毕生难忘嘅经历！”