藝員黃浩然到電台受訪，講到其主演的劇集《無雙譜》被觀眾批評特技不夠好，他表示：「一定好過以前架啦，我自己都有睇，有啲觀眾話水底特技可以好啲，但我又覺得OK喎，幾特別，同埋我幾鍾意香香（岑麗香）嘅鯉魚精角色。（想唔想憑呢套劇提名台慶頒獎禮？）我得一個單元，難啲，係都畀阿田（田蕊妮）提名晒，視帝視后佢攞晒，我同Bosco（黃宗澤）都認輸，不過都希望有得提名，可以一齊玩吓。」之後他又力撐黎耀祥攞視帝，說：「佢之前都係做正派角色攞獎，但今次喺《梟雄》就係做上海大亨，係奸角，而且套劇對手好強，所以希望佢攞。」

撐陳凱琳專業

至於講到他之前因病辭演的《張保仔》，他則謂沒有看，之後他又估到記者想講陳凱琳（Grace）演技被黃秋生批評，他即力撐Grace說：「我同佢拍過《名門暗戰》，佢係好專業同勤力嘅演員，我都有睇過鄭嘉穎嘅回應，我都覺得要畀多啲時間佢同Tony（洪永城），我上年病咗，知道Tony接到劇本前本身係去旅行，之後一、兩日佢已經要開工，好多嘢都未準備好，所以公平講係真係需要時間，而Grace亦係好強嘅女仔，會喺鞭策中成長，而且拍《張保仔》都大壓力，一日要開三組，打戲、外景同廠景，又有動作戲，希望大家係畀佢哋鼓勵而唔係批評。（自己冇睇《張保仔》？）冇呀，淨係睇過trailer，因為九點幾十點個時間我兩個仔要瞓覺，唔開得電視，所以如果有我嘅劇我會同老婆上網睇番。」