王維德唔排除會返無綫

20151012
東網電視
更多新聞短片
王維德曾在無綫工作20年以上,他認為發展空間不大。
藝人王維德到電台分享靈異經歷,自爆小時試過玩碟仙:「嗰時咩規矩都唔識,可能有啲唔尊重,之後一星期就發生啲唔係咁開心嘅事,細佬喺高處跌咗落嚟爆晒缸,我就喺屋企唔見咗銀包,依家做咗基督徒講出嚟都係想提醒人唔好玩。」
講到早前從TVB轉到製作公司,他表示將會參與電影和音樂會,他又講到TVB的發展空間不大:「我都喺無綫20年以上,一年有戲做嘅機會真係唔多,可能一年先得兩套,三線演員嚟講有得拍已經好開心,遲啲《梟雄》我戲份都多,依家有其他發展機會都想試吓,話唔定遲啲會返去無綫。」
他又講到在TVB多年最開心是參與《Sunday 扮嘢王》的時候:「多謝薛家燕同王祖藍發掘我哋,可以自己發揮,我又好鍾意扮嘢,扮過天堂鳥同周潤發,滿足感好大。」而每年最開心則是歡樂滿東華:「喺四分鐘內,所有嘢都自己策劃,又會搵舞蹈員,一半手語一半跳舞,好精彩,都係好滿足。」
問到離開TVB後可會覺得唏噓?王維德直言總會有一點:「初初入行時年輕滿腔熱誠,我喺公司都一直好乖,但公司唔同部門都係有啲不協調,會配合唔到。」他坦言有時覺得自己外貌條件好多都能夠勝任,但就是沒有機會:「好似有啲手語角色,明明係我年紀,又唔搵我做,但要我幫手。」他又講到早幾年試過在馬來西亞拍劇,反應不錯,亦有公司想找他簽約,可惜錯過了機會:「個啲又唔奮氣想喺TVB多幾年,依家有個新嘗試,新公司畀好大空間我,遲啲音樂會都加好多自己意見,好想係做每一樣嘢都有自己訊息帶出嚟。」