鄭嘉穎以代言身分出席頒獎禮。問到他與陳凱琳可會情侶檔做代言？嘉穎表示會視乎產品，談到之前被指當眾鬧記者廢青，他指與傳媒不嬲互相尊重，並謂：「一開始大家態度都有問題，我會好言相勸，都希望有私人空間。對方話想做訪問，我拒絕咗。我話遠距離影相係冇問題，但近距離影就造成滋擾，咁樣就有問題。我唔記得有冇用到過廢字（鬧人）。」

問到他如此兇惡怕否嚇親女友，他說：「我平時唔係咁，睇情況而定，某啲特定情況先係咁，我承認自己係公眾人物，但係喺香港，應該有一個香港人嘅權利，我可以選擇唔去接受訪問，如果連呢個權利都冇嘅話，我覺得好可悲，我係唔能夠接受。影係冇問題，但唔好騷擾到我哋，我話咗唔接受訪問，尊重係應該，但都要雙方。」

談到女友陳凱琳力撐他，問到會否感開心，他說：「我都係講道理啫，如果我講嘅係有道理，佢撐我，我會開心，如果道理喺對方嗰邊，我會講對唔住，因事而定，如果自己根本都冇道理，佢撐我反而會唔開心。」