藝人黃愷傑（Wesley）在父親黃錦燊、國奧影業（國際）有限公司高層于洋及陳欣健陪同下，到觀塘與傳媒茶聚。

Wesley早前在內地真人騷節目《壯志凌雲》勝出，于洋及陳欣健宣布稍後將會開拍新片《駝峰航線》，讓Wesley飾演機師，一展所長，Wesley說：「我都想演機師，因為我對呢方面已經做咗功課，加深咗認識，雖然話真人騷，但個節目好考我哋體能、心理質素、速度感同有冇畏高、應變能力等，拍嘅時候我都整傷膝頭，已經好番。（女友呵番？）佢有叫我加油。（佢返內地探你班？）冇，拍攝時，經理人、助手都唔可以陪同。」

Wesley被問會否想拍無綫劇，他說：「暫時都冇搵我，但有機會都想參與，好多前輩我都想合作，好似最近話走嘅陳國邦，我鍾意佢演技。（要你剃頭拍古裝，肯唔肯？）暫時都未試過演古裝，但有導演曾經話我都可以，剃頭我都OK。（女友捨得？）剃咗會生番嘅！（外表洋化驚唔驚被中式對白考起？）我會做多啲功課。」

陳欣健則透露為Wesley打造大片的大計，他說：「《駝峰航線》會同外國合作，呢套戲預算製作費逾2億幾美金，預計2019年1月上映，大約年零後開拍。（會同咩外國公司或影星合作？）我哋持開放態度，唔局限荷里活公司，凡有興趣發展內地嘅，就算日本、澳洲都可以合作。影星方面我諗戲中有啲教官角色會適合荷里活演員，湯告魯斯、湯漢斯呢啲拍戲會揀劇本嘅演員，相信佢哋會鍾意我哋套戲。」