陳煒爆劇中同馬國明咀嘴兼被睇全相

無綫台慶劇《梟雄》晚上在九龍灣E-Max舉行首映，三十年後再拍無綫劇的湯鎮業被問到對收視期望，他說：「冇架，佢哋話好咪好，當然希望觀眾接受，依家觀眾唔同以前，《梟雄》係好難得有咁實在嘅劇，好似以前《上海灘》咁會畀觀眾記得。（秋生話收視好你請食大閘蟹？）收得梗係佢請。（秋生睇好黎耀祥攞視帝？）TVB立場梗係畀祥仔，祥仔又大突破做反派。（會再返TVB拍劇？）睇啱先，唔係咁多戲種啱我做，自己都三十年冇返嚟拍劇，睇下觀眾反應先。」

讚秋生演戲係典範

而黎耀祥被問到對《梟雄》收視可有信心？他說：「都應有信心，難得一齊睇劇，未播網上都好多談論，畫面、上海實景都令大家耳目一新，希望收視過三十啦。（準備再攞視帝？）唔係，秋生、阿湯演得好好，秋生啲戲真係典範，所有演員都應該向秋生學習，演出幾有驚喜。（祼泳祝捷？）你哋想睇邊個呀？有好多都好睇嘅，我哋有乜好睇。」

陳煒則騷「事業線」性感亮相，她說：「公司話要隆重啲，所以就揀咗套晚裝。（老公睇過批准？）佢有咩未睇過呀，哈哈。」陳煒又透露劇中與馬國明有咀戲，她笑說：「佢仲睇過我全相添。」她又指期待新劇播出，近日興奮得失眠。