歌手許廷鏗（Alfred）昨日舉行照相會活動，吸引近百歌迷到場支持。活動上，Alfred特意獻唱了兩首新歌《郵輪》及《阿樂》，之後與粉絲大玩遊戲，去到重頭環節，更逐一與粉絲拍下即影即有的合照。

粉絲唔會做越軌行為

受訪時，Alfred笑謂自己的粉絲很乖，不會在合照時做出越軌行為，說：「佢哋偏向怕醜，唔會飛擒大咬！」他又笑言知道一眾粉絲期待已久，特意化好妝與他們合影，說：「要Keep好個樣，唔係啲醜嘅相會流傳萬世。（有醜相流傳梗？）好多，由《超級巨聲》開始就畀人捕捉到我唱歌擘大口嗰啲，所以我都食過吓夜粥，成日練習，Chok係做藝人必備嘅！」

Alfred日前在新加坡的《星和無綫電視頒獎禮》奪得「最喜愛劇集歌曲獎」，問到可會為年底的台慶頒獎典禮奪獎打下強心針？他說：「冇諗呢樣嘢，獎係其次，今次去新加坡我感受到當地Fans對我嘅支持，臨走前仲送咗班蘭蛋糕我食，驚我唔夠肥，之後都想去多啲地方見Fans！」

同林欣彤少咗聯絡

而「巨星幫」繼羅孝勇之後，有傳同樣約滿無綫的林欣彤亦不會續約無綫，作為好友的Alfred表示不知情，說：「呢排少咗聯絡，同埋一見面都講輕鬆嘅，我覺得大家都有自己取態嘅。（你呢？）我未有時間同空間去諗呢啲。」