Bobby環保演技VS秋生高音上海話

無綫視帝今年競爭激烈，由喺劇集《東坡家事》擔正男主角嘅歐陽震華（Bobby），硬撼《梟雄》兩大男主角黃秋生同黎耀祥！有網友仲將Bobby同黃秋生做對比，仲話視帝之爭相信會係一場龍爭虎鬥！

咁到底Bobby喺《東坡家事》表現係點呢？唔知網民眼角高定做過導演，有人CAP低Bobby新片嘅演出放上網，結果引起一堆網友嘅唇槍舌劍！有人話Bobby隻眼好識做戲，不時碌大對眼表現驚訝或驚慌、眼珠向上表示有嘢要諗或者講大話、反白眼代表瞓緊覺，表情仲不斷循環再用，有網友話﹕「相當環保！」但亦有人話：「可能係角色需要姐（啫），我覺得佢幾盞鬼！」

那些年，我們到底一起追過幾多套Bobby嘅劇集呢？介紹番，Bobby喺《法證先鋒》系列、《陀槍師姐》系列、《洗冤錄》同《壹號皇庭》一直屢創佳績，無綫嗰陣嘅收視真係升到嘭嘭聲，最高記錄達47點！相信依個數字大家一定會好陌生，因為真係好耐冇試過有咁高收視喇！由於《東坡家事》都係啱啱開播未到高潮位，所以收視嘅嘢就真係要拭目以待喇！

另一方面，咁攞過影帝嘅秋生又演成點呢？雖然之前都講過吓，但既然話得要將兩大好戲之人比併，當然要再寫得再深入啲啦。有啲高層次嘅網民，誇張到話秋生哥連瞓覺都交到內心戲，又有人話佢企喺度都有戲，總之就勁到不得了啦！但對於秋生哥喺劇中講上海話，一班網友就有啲微言：「點解佢一講上海話就高八度，請解釋！」有秋生迷就幫口話：「人哋秋生哥係好戲之人，表達手法嘅嘢你哋識嘜（乜）啊？」、「都喺（係）嗰句啦，秋生哥演戲嗰陣，大家都仲食緊奶粉咋。」

網民有話兒﹕

開心Ｘ﹕點解佢一講上海話就高八度，請解釋！

人魚ＸＸ﹕人哋秋生哥係好戲之人，表達手法嘅野（嘢）你哋識嘜（乜）啊？

Ｘ鬼Ｘ者﹕Bobby表情重複，相當環保！

KittyＸ﹕可能係角色需要姐（啫），我覺得Bobby幾盞鬼！

PrettyＸ﹕都喺（係）嗰句啦，秋生哥演戲嗰陣，大家都仲食緊奶粉咋。

「東網巨星」fb專頁：

每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。